Will these new one glow in film field

**gclokesh** · by **gclokesh** on Tue Oct 20, 2009 2:32 am

ಖ್ಯಾತ ನಟಿ ಕಲ್ಪನಾ ನಮ್ಮನ್ನಗಲಿ ದಶಕಗಳೇ ಆದವು. ಆದರೆ ಆ ಮಾತು ಈ ಮಾತುಗಳನ್ನಾಡುವಾಗ ಮಿನುಗುತಾರೆ ಎಂಬ ಪದ ಸುಳಿದಾಗಲೆಲ್ಲಾ ಅವರು ಅಪ್ರಯತ್ನವಾಗಿ, ಸುಖಾಸುಮ್ಮನೆ ಹಾಗೆ ನೆನಪಾಗಿ ಕಾಡುತ್ತಾರೆ. ಪುಟ್ಟಣ್ಣ ಕಣಗಾಲರಿಂದ ಕಡೆಯಲ್ಪಟ್ಟ ಈ ಶಿಲ್ಪ ತಮಗೆ ಸಂದಿದ್ದ ಬಿರುದನ್ನು ಸಾರ್ಥಕ್ಯಗೊಳಿಸಿದ್ದರು ಎಂಬುದು ಚಿತ್ರರಸಿಕರ ಅಭಿಪ್ರಾಯ.

ಈಗ ನಾವು ಬರೆಯ ಹೊರಟಿರುವುದು ಮತ್ತೆರಡು ಮಿನುಗು ತಾರೆಗಳ ಬಗ್ಗೆ. ಇವರಿಗೆ ಕನ್ನಡ ಚಿತ್ರರಂಗವೇನೂ ಅಘೋಷಿತವಾಗಿ ಮಿನುಗುತಾರೆಯರೆಂದು ಬಿರುದು ಕೊಟ್ಟಿಲ್ಲ. ಆದರೂ ಇವರೀಗ ಸದ್ಯಕ್ಕೆ ಮಿನುಗು ತಾರೆಗಳು. ಅವರೇ ಪೂಜಾ ಗಾಂಧಿ ಮತ್ತು ಸುನಿಲ್ ರಾವ್. ಪೂಜಾ ಗಾಂಧಿಯವರ ಪರಿಚಯವನ್ನೇನೂ ಮಾಡಿಕೊಡಬೇಕಿಲ್ಲ. ಆದರೆ ಸುನಿಲ್ ರಾವ್ ಕುರಿತು ಮರು ಪರಿಚಯ ಮಾಡಿಕೊಡಬೇಕಾಗಿ ಬಂದಿದೆ. ಇವರು ಮತ್ಯಾರೂ ಅಲ್ಲ. ಎಕ್ಸ್ಯೂಸ್ ಮಿ, ಸಖ-ಸಖಿ, ಮಸಾಲೆ ಇವೇ ಮೊದಲಾದ ಚಿತ್ರಗಳಲ್ಲಿ ನಟಿಸಿ, ಯಾಕೋ ಏನೋ ಕೆಲದಿನ ಬೆಳ್ಳಿತೆರೆಯಿಂದ ಹಿಂದೆ ಸರಿದಿದ್ದ ಅದೇ ಸುನಿಲ್.

ಇವರಿಬ್ಬರೂ ಈಗ ಮಿನುಗು ಎಂಬ ಚಿತ್ರದಲ್ಲಿ ಜೊತೆಯಾಗಿದ್ದಾರೆ. ವಾಸ್ತವವಾಗಿ ಇವರಿಬ್ಬರೂ ತಾಜ್ ಮಹಲ್ ಚಿತ್ರದಲ್ಲಿಯೇ ಒಟ್ಟಾಗಿ ನಟಿಸಬೇಕಿತ್ತು. ಆದರೆ ಅದೇ ಸಮಯದಲ್ಲಿ ಪೂರ್ವನಿರ್ಧರಿತ ಕಾರ್ಯಕ್ರಮವೊಂದಕ್ಕಾಗಿ ಸುನಿಲ್ ಅಮೆರಿಕಾಕ್ಕೆ ತೆರಳಬೇಕಾದ್ದರಿಂದ ಅವರ ಜಾಗಕ್ಕೆ ಅಜಯ್ ಬಂದರು ಎಂಬುದು ಎಲ್ಲರಿಗೂ ಗೊತ್ತಿರುವ ಸಂಗತಿ.

ಎ.ಜಯವಂತ್ ಅವರು ಕಥೆ ಬರೆದು ನಿರ್ದೇಶಿಸುತ್ತಿರುವ ಈ ಚಿತ್ರವನ್ನು ಗಜೇಂದ್ರ ಜಿ. ನಿರ್ಮಿಸಿದ್ದಾರೆ. ರಾಜೇಶ್ ರಾಮನಾಥ್ ಅವರ ಸಂಗೀತವಿರುವ ಈ ಚಿತ್ರ ಬೆಳ್ಳಿತೆರೆಯಲ್ಲಿ ಎಷ್ಟರಮಟ್ಟಿಗೆ ಮಿನುಗಲಿದೆ ಎಂಬುದೇ ಎಲ್ಲರ ಕುತೂಹಲ. ಏಕೆಂದರೆ ಪೂಜಾ ಗಾಂಧಿಯವರ ಇತ್ತೀಚಿನ ಯಾವ ಚಿತ್ರವೂ ಯಶಸ್ಸು ಕಂಡಿಲ್ಲ ಹಾಗೂ ಸುನಿಲ್ ರಾವ್ ಕೊಂಚ ಕಾಲದ ನಂತರ ಮರಳಿದ್ದಾರೆ. ಆದರೆ ಚಿತ್ರ ಚೆನ್ನಾಗಿದ್ದರೆ ಇವ್ಯಾವುದೂ ಲೆಕ್ಕಕ್ಕೆ ಬರುವುದಿಲ್ಲ ಅಲ್ಲವೇ?